"Maydan" hərəkatı Gürcüstanda təkrarlanmayacaq | Kobaxidzedən açıqlama

“Gürcüstan Prezidenti Salome Zurabişvili mandatının bitməsindən sonra vəzifəsini tərk edəcək”.

Bunu ölkənin Baş naziri İrakli Kobaxidze keçirdiyi mətbuat konfransında bildirib.

O əlavə edib ki, Salome Zurabişvilinin səlahiyyətlərini təhvil verməkdən imtina etməsinə baxmayaraq, rezidensiyanı tərk etmək məcburiyyəti yaranacaq.

Baş nazir qeyd edib ki, Gürcüstanda təkrar parlament seçkiləri keçirilməyəcək.

Bundan əlavə, İ.Kobaxidze bildirib ki, ABŞ-nin Gürcüstanla strateji tərəfdaşlığı dayandırmaq qərarı müvəqqəti haldır.

Onun sözlərinə görə, hazırkı administrasiya yeni administrasiyaya mümkün qədər ağır miras qoymağa çalışır:

“Onlar bunu Ukrayna ilə əlaqəli etdilər, indi isə Gürcüstanla əlaqəli edirlər. Bunun heç bir prinsipial əhəmiyyəti olmayacaq, biz yeni administrasiyanı gözləyəcəyik və hər şey haqqında yeni administrasiya ilə danışacağıq. Bu, Salome Zurabişvili kimi müvəqqəti hadisədir”, – deyə Baş nazir bildirib.

Daha əvvəl ABŞ Dövlət Departamentinin mətbuat katibi Metyu Miller “X” sosial şəbəkəsində bildirib ki, ABŞ Gürcüstanla strateji tərəfdaşlığı dayandırmağı qərara alıb. Sonradan ABŞ Dövlət Departamenti bu qərarla bağlı ətraflı bəyanat da yayıb.