"Ölkəmiz səfərbər olmağa hazırdır" | Nazir müavinindən sərt xəbərdarlıq - Baku TV

Kuba ehtimal az da olsa, ABŞ ilə hərbi toqquşmaya hazırdır.

Bu barədə Kuba xarici işlər nazirinin müavini Karlos Fernandes de Kossio NBC telekanalına müsahibəsində bildirib.

“Ölkəmiz tarixən həmişə hərbi təcavüz halında vahid bir qurum olaraq səfərbər olmağa hazır olub. Kuba Ordusu ABŞ-nin mümkün hücumuna hazırlaşır, dünyada baş verənlər fonunda belə tədbirlərin olmamasını düşünmək sadəlövhlük olardı. Silahlı qüvvələrimiz hər zaman hazır vəziyyətdədir və hazırda da hərbi təcavüz ehtimalına qarşı hazırlıq görürlər”, – deyə kubalı nazir müavini bildirib.

O əlavə edib ki, rəsmi Havana ABŞ ilə problemlərin sülh yolu ilə həllinə ümid edir. “Bunun baş verməsi üçün heç bir səbəb görmürük və buna heç bir bəraət qazandırmırıq”, – deyə o söyləyib.

Donald Tramp administrasiyasının Kuba lideri Migel Dias-Kaneli hakimiyyətdən uzaqlaşdırmaq istədiyi barədə əvvəllər də məlumatlar yayılmışdı. Kuba xarici işlər nazirinin müavini Karlos Fernandes de Kossio həmçinin bildirib ki, Kuba hökumətinin xarakteri, strukturu və ya tərkibinin ABŞ ilə danışıqlar mövzusu ola biləcəyi ilə bağlı hər hansı bir fikir doğru deyil.