"TikTok"dakı yeniliklər Avropanı hərəkətə keçirdi | Əsl səbəb isə...

Avropa “TikTok” sosial şəbəkəsinə qarşı savaş açıb.

Son günlər qoca qitədə ardıcıl şəkildə bu platforma ilə bağlı qadağalar sərtləşdirilir.

Öncə 2023-cü ilin fevralında Avropa Komissiyası öz əməkdaşlarına telefonlarına bu platformanı quraşdırmağı qadağan etdi. Maraqlıdır ki, qurum bununla bağlı normal izahat təqdim etmədi.

Avropa Komissiyasının bu qərarı uzun müddət təşkilata üzv olan bir çox ölkənin media qurumunda ciddi tənqid edilmişdi. Çoxları bunu komissiya rəhbərliyinin daha çox avtoritarlaşması ilə izah edirdi. Ancaq tənqidlər nəticə vermədi və qoca qitəni idarə edənlər “TikTok”dan əl çəkmək niyyətində deyillər.

Budəfəki qadağalar əvvəlkindən daha sərtdir. “TikTok” mesajlaşma bölümünə yeni imkanlar əlavə etməklə funksionallığı genişlədirib. Bundan sonra istifadəçilər mesajlaşma bölümündə 32 nəfərdən ibarət qrup çatları yarada biləcəklər. Yaradılmış qrup çatlarında videolar paylaşmaq və onlara rəy bildirmək mümkün olacaq. Bu cür çatların istifadəçiləri yaradıcı videolar və məlumat paylaşdıqca idarə edənlərlə əlaqə qurur və onlar tərəfindən mükafatlandırılırlar.

Komissiya bu qənaətdədir ki, “TikTok”a gətirilən bu cür yeniliklər insanları başqa məqsədlər üçün ələ almaq və uşaqları fərqli yönlərə çəkmək üçün istifadə edilir.

Avropa Komissiyası bununla da kifayətlənməyib və “TikTok”un tətbiqinin əlavə versiyası olan “TikTok Lite”a qarşı məhkəmə iddiası qaldırıb. Yeni proqramın əsas üstünlüyü 18 yaşından yuxarı istifadəçilərin videolara baxmaq, bəyənmək və yeni dostlar dəvət etməklə xal və mükafatlar qazanmasına şərait yaratmaqdır. “Lite” tətbiqindən istifadə edənlər 85 dəqiqəyə qədər videolara baxaraq xal qazana bilərlər. Xallar “Amazon çekləri”, hədiyyə kartları və müxtəlif digər valyutalara çevrilə bilir.