Qurbanlarını xüsusi üsullarla qətlə yetirən qadın | Amerikada bu hotelə girən sağ çıxmırdı

Onun adı hələ də tarixçilər, turistlər və əfsanə sevərlər arasında maraqla müzakirə olunur.

Laviniya Fişer Amerika tarixində ilk qadın seriya qatili olaraq tanınır. Həyatı və cinayətləri ilə bağlı çoxlu mübahisələr olsa da, Laviniya və həyat yoldaşı Con Fişer XIX əsrin əvvəllərində Cənubi Karolinanın ən qorxunc cütlüyü kimi yadda qalıb.

Laviniya 1793-cü ildə doğulub. Uşaqlıq illəri və gənclik həyatı haqqında məlumatlar çox məhduddur. Bioqrafiyasında cazibədar, ağıllı və manipulyativ bir qadın olduğu yazılır.

Çarleston şəhəri yaxınlığında yerləşən və Con Fişerlə birgə işlətdiyi hotel səyyahlar üçün dayanacaq yeri idi.

Əfsanəyə görə, Laviniya və Con hotelə gələn qonaqları öldürərək onların pul və qiymətli əşyalarını oğurlayırdı. Laviniya zərif davranışları ilə qurbanlarını aldadır, onlara xüsusi çay təqdim edirdi. İddialara görə, bu çay zəhərli idi. Qonaqlar çayı içdikdən sonra halsızlaşırdılar. Daha sonra cütlük onları ya boğur, ya da xüsusi bir mexanizm vasitəsilə yataqlarından zirzəmiyə salırdı.

Hoteldə bir neçə insanın yoxa çıxması yerli əhalini narahat edir. Bu şübhələr nəticəsində Laviniya və Con həbs edilib. Amma onlara qarşı konkret sübutların olmaması səbəbindən azadlığa buraxılıblar.

Bir müddət sonra digər cinayətlərin aşkara çıxması ilə cütlük yenidən həbs olunub və 1819-cu ildə məhkəməyə çıxarılıb. Onlar soyğunçuluq və qətllərdə təqsirli bilinərək edam cəzasına məhkum ediliblər. Laviniya Fişer 1820-ci ildə asılaraq edam edilib.

Laviniya rəsmi olaraq ABŞ-nin ilk qadın seriya qatili kimi tanınır. Amma törətdiyi qətllər ilə bağlı dəqiq heç nə sübut olunmayıb. İndiyə qədər ABŞ-nin kriminal tarixində mübahisəli sima olaraq qalır.