Quruda, suda və havada döyüş hazırlığı təmin edilir | Çin

Çin Xalq Azadlıq Ordusunun (ÇXAO) şərq qoşunları Tayvan adasının ətrafında 2026-cı il üzrə təlim mövsümünün açılışını edib.

Adanın şimal, şərq, cənub, cənub-qərb və cənub-şərq hissəsində keçirilən təlimlərə quru, dəniz, hava və raket qüvvələrinin bölmələri cəlb olunub.

ÇXAO-nun yaydığı məlumatda deyilir ki, təlimlər zamanı dənizdə və havada döyüş hazırlığının təmin edilməsi, hərtərəfli üstünlüyün birgə ələ keçirilməsi, əsas limanların və ərazilərin blokadası, eləcə də ada zənciri xaricində hərtərəfli çəkindiricilik məsələlərinə diqqət yetiriləcək.

“Tayvan adasına fərqli istiqamətlərdən gəmilərin və təyyarələrin yaxınlaşması ilə müxtəlif növ qoşun bölmələrinin birgə əməliyyatlar aparmaq imkanlarını yoxlamaq üçün ortaq şərti hücumlar həyata keçirilir”, – məlumatda bildirilib.

Təlimlərin “Tayvanın müstəqilliyi”ni müdafiə edən separatçı qüvvələrə və xarici müdaxilələrə qarşı sərt bir xəbərdarlıq olduğu vurğulanıb.