Rəfahda xeyli mülki şəxs həlak oldu | İsraildən reaksiya

Yaxın Şərqdə vəziyyət gərgin olaraq qalır.

İsrail Ordusu gecə boyunca Rəfahdakı çadır şəhərciyini bombalayıb.

Xarici KİV-in yaydığı məlumata görə, azı 50 nəfər həlak olub. Həyatını itirənlər arasında çadıra sığınan qadın və azyaşlılar üstünlük təşkil edir. Ölənlərin sayının artacağı isə istisna edilmir. Ölkə rəsmiləri hücumların dayandırılması üçün səlahiyyətli şəxslərə səsləniblər.

Hətta İsrail Kommunist Partiyasının deputatı Ofer Kassif də “Rəfahda qətliam baş verir. Qəzzadakı soyqırımının günahkarları ədalət qarşısında cavab verəcəklər!”, – deyə “X” hesabında yazıb.

Bütün bunların fonunda isə İsrail Müdafiə Ordusu mülki şəxslərin həlak olmasından xəbərdar olduğunu və məsələnin araşdırıldığını açıqlayıb. Qeyd olunub ki, SAXAL HƏMAS-ın vacib şəxslərinin Rəfahda yerləşən iqamətgahlarını vurub.

“Zərbə beynəlxalq hüquq çərçivəsində qanuni hədəflərə əsasən və kəşfiyyat məlumatlarımız əsasında həyata keçirilib. HƏMAS-ın ərazidən necə istifadə etdiyini biz yaxşı bilirik. Bundan əlavə, zərbələr nəticəsində məkanda çıxan yanğın səbəbindən bölgədə mülki şəxslərin ölməsi barədə məlumatımız var. Hadisə araşdırılır”, – deyə məlumatda bildirilib.

Xəbərdə həmçinin qeyd olunub ki, aviazərbələr nəticəsində HƏMAS hərbi qruplaşmasının rəhbər şəxslərindən 2-si zərərsizləşdirilib. Sözügedən liderlər təşkilatın Samariyadakı qərargahının komandiri Yasin Rabia və HƏMAS-ın həmin bölgədəki yüksəksəviyyəli nümayəndəsi Xalid Naqaradır.

Məlumat üçün bildirək ki, İsrailin hücum etdiyi qaçqınlar üçün nəzərdə tutulmuş çadırlardan ibarət bu şəhərcik BMT tərəfindən salınıb.