Rihanna, Bill Qeyts, Zukerberq... | Dünya ulduzları Hindistanda milyarder toyunda

Dünyanın ən məşhur hindistanlı milyarderi Mukeş Ambani son beşiyinə 3 gün davam edən toyqabağı ziyafət edib.

Yerli medianın məlumatına görə, Camnaqarda keçirilən şənlikdə qonaq qismində 1200 nəfər iştirak edib.

Hindlilərin təbilincə desək, şənliyə ev yiyəsinin öz kastasına yaxın adamlar təşrif buyurublar. Onların siyahısında Rihanna, Mark Zukerberq, İvanka Tramp, Bil Qeyts, Bollivud aktyorlarından Saif Ali Xan və onun həyat yoldaşı Karina Kapur, Şahruk Xan, Hollivud ulduzlarından isə Adam Sendler və başqa məşhur şəxslər yer alıb.

Tədbirə 3 min işçi heyət qulluq edib. Qonaqlara 100-ə yaxın aşpaz tərəfindən hazırlanmış 500 yemək təqdim edilib.

Adətən gündə 10-dan az uçuş yerinə yetirən şəhər hava limanı da 3 gündə xüsusi aktivliyi ilə seçilib. Belə ki, həmin günlərdə Mumbay hava limanı 130-dan çox reys icra edib. Nyu-Dehli və Mumbaydan kirayələnmiş təyyarələr, saç stilistləri, vizajistlər də qonaqlara ev yiyəsi tərəfindən hədiyyə edilib.

Bundan başqa, Ambani ailəsi 50 000-dən çox aztəminatlı hindli ailəyə şam yeməyi qonaqlığı verib. Ümumilikdə 3 günlük ziyafət ailəyə 150 milyon dollara başa gəlib.

Məlumat üçün bildirək ki, hindistanlı 28 yaşlı Anant Ambaninin 29 yaşlı sevgilisi Radhika Merchant ilə toyu iyulda baş tutacaq.

Məlumata görə, 113 milyon dollar xərclənəcəyi gözlənilən mərasim üçün xüsusi olaraq yeni hindu məbəd kompleksi belə tikilir.

Xatırladaq ki, hindistanlı Mukeş Ambani dünyanın ən varlı adamlarından biridir. “Forbes” nəşrinin məlumatına görə, o, siyahıda 117 milyard dollarlıq sərvəti ilə 9-cu yerdə qərarlaşıb.