Roma Papası Fransisk ölümündən öncə Qəzza ilə bağlı nəyi tapşırıb?

Roma Papası Fransiskin istifadə etdiyi "Papamobil" avtomobili Qəzza zolağında uşaqların müalicəsi üçün səyyar tibb məntəqəsi kimi istifadə ediləcək.

Bu barədə İtaliyanın "Corriere della Sera" qəzeti məlumat yayıb.

Qeyd olunub ki, ölümündən əvvəl pontifik özü Yerusəlimdəki "Caritas" xeyriyyə təşkilatına bu cür istəklə müraciət edib. "Papamobil" artıq təhvil verilib və hazırda mütəxəssislər onun təchizatı ilə məşğuldurlar.

Qəzetin bildirdiyinə görə, avtomobil diaqnostika, analizlərin aparılması və müalicə üçün avadanlıqlarla təchiz olunacaq. Xüsusilə orada infeksiyaların aşkarlanması üçün ekspres-testlər, tikişlərin qoyulması üçün dəstlər, oksigen balonu, vaksinlər, həmçinin dərmanların saxlanılması üçün soyuducu olacaq.

Qəzzaya humanitar dəhliz yenidən açıldığı zaman bu avtomobil uşaqlara ilkin tibbi yardım göstərməyə başlayacaq.