Roma Papasına hazırlanan maşının adı açıqlandı | Avtomobilin maraqlı özəllikləri

Vatikana artıq təxminən 100 ildir maşın tədarük edən “Mercedes-Benz” şirkəti elektrikli “G580” yolsuzluq avtomobili əsasında yeni “Papamobil” hazırlayıb.

Nəqliyyat vasitəsi artıq Roma Papası Fransiskə təqdim edilib.

Bildirilir ki, bu “Mercedes-Benz Gelandewagen” açıq tavanlı, arxa dirəkləri olmayan, arxa hissədə “göyərtəsi” olan unikal kuzov konstruksiyası və pontifikin müxtəlif tərəflərdən auditoriyaya müraciət etməyə imkan verən xüsusi rahat oturacağı ilə fərqlənir.

Bununla bağlı yayılan fotodan görünür ki, əvvəlki “Papamobil”lər kimi, bu da klassik mirvari-ağ rəngdə boyanıb. Əlverişsiz hava şəraiti üçün avtomobildə şəffaf tavanlı xüsusi sərt üst konstruksiya nəzərdə tutulub.

Şirkətdən bildirilib ki, elektromobilin güc qurğusu ictimai tədbirlərdə aşağı sürətlə rahat gediş üçün uyğunlaşdırılıb.