Rusiya-ABŞ münasibətləri bərpa olunsa... | Tramp Cənubi Qafqazda kimin tərəfində olacaq?

“Rusiya ilə Amerika arasında münasibətlər qismən də olsa bərpa olunsa, müsbət tendensiya yaransa, o zaman bunun Cənubi Qafqaz elitasının əhvali-ruhiyyəsinə təsir edəcəyi aydındır”.

Bunu “Moskva-Bakı”ya müsahibəsində rusiyalı politoloq Andrey Bıstritski deyib.

“Tramp Cənubi Qafqazda heç kimin tərəfində olmayacaq. Eyni zamanda qərbi avropalıların regionda fəallığı artacaq və artıq artmaqdadır. Regiondaxili münasibətlərin konfiqurasiyasından danışırıqsa, onda burada hər bir ölkə öz maraqları haqqında daha çox düşünməli olacaq. Cənubi Qafqazın bütün dövlətləri öz siyasətinə görə çox fərqlidir. Ermənistandan danışırıqsa, o zaman Baydenin dövründə də onun dəstəyi realdan daha simvolik idi.

Paşinyan faktorunu izah etmək mənim üçün çətindir, amma bu, tibbi faktdır. O, davamlı və çox israrla siyasi ritorika səsləndirir, hansı ki, orada arzuladığını reallıq kimi qəbul edir. Baydendən Ermənistana real dəstək olmadı. Eləcə də Avropa tərəfdən. Bu, mistika idi. İndi Trampın dövründə bu mistika da azalacaq, dəstək isə daha da azalacaq.

Gürcüstan son vaxtlar çox müstəqil hərəkət edir. Gürcüstan hakimiyyəti əhalini öz ətrafında birləşdirə bildi. Azərbaycan müstəqil, özünü təmin edən ölkədir, başqasına deyil, konkret olaraq Azərbaycan Respublikasına lazım olan suveren qərarlar qəbul etmək üçün kifayət qədər güclənmiş bir dövlətdir. Bu və ya digər ölkənin milli elitası möhkəmlənibsə və dövlətin nəyə ehtiyacı olduğunu bilirsə, onda müxtəlif geosiyasi çəkişmələr ölkəyə təsir etmir”, – o bildirib.

Politoloq qeyd edib ki, Cənubi Qafqazda ABŞ-də bu və ya digər administrasiyanın hakimiyyətdə olmasının əhəmiyyətini şişirtməyə ehtiyac yoxdur:

“Hətta Trampın belə sözləri ilə hərəkətləri arasında böyük fərq var. Bəli, ABŞ-nin Demokratlar administrasiyası Cənubi Qafqazda Respublikaçılardan daha fəal idi. Tramp administrasiyası heç bir münaqişənin tərəfi olmaq istəmədiyini və diqqətini Amerikanın daxili işlərinə yönəltmək niyyətində olduğunu vurğulayıb”.