Rusiya aeroportlarında həyəcanlı anlar | Müharibədə ağır gecə

Rusiya ilə Ukrayna arasında hərbi vəziyyət gərgin olaraq qalır.

Avqustun 11-dən 12-nə keçən gecə Rusiya silahlı qüvvələri Ukraynanın bir neçə vilayətini dron və raketlərlə atəşə tutub.

Bununla yanaşı, Ukrayna Quru Qoşunlarının mətbuat xidmətindən bildirilib ki, Qoşunların təlim bölmələrindən birinin ərazisinə raket hücumu həyata keçirilib. "Raket təhlükəsi" siqnalı daxil olduqdan dərhal sonra şəxsi heyət məlumatlandırılıb, görülən təhlükəsizlik tədbirlərinə baxmayaraq ölən və xəsarət alanlar var. İlkin məlumata görə, 1 hərbçi həlak olub, 11 nəfər yaralanıb.

Dnepropetrovsk vilayətinin qubernatoru Sergey Lısak isə bildirib ki, gecə və səhər saatlarında həyata keçirilən kütləvi hücum nəticəsində bir neçə nəfər yaralanıb, fərdi yaşayış evlərinə, iki çoxmərtəbəli yaşayış binasına, avtomobillərə ziyan dəyib, elektrik ötürücü xətt sıradan çıxıb.

Ölkənin hərbi qərargahından vurğulanıb ki, son sutka ərzində cəbhədə 168 hərbi toqquşma qeydə alınıb. Bununla yanaşı, son 24 saat ərzində Rusiya silahlı qüvvələrinin daha 980 hərbçisi, 250-dən çox hərbi texnikası məhv edilib.

Rusiya Müdafiə Nazirliyindən isə bildirilib ki, gecə ərzində hava hücumundan müdafiə qüvvələri Ukraynaya məxsus 25 PUA zərərsizləşdirib. Federal Hava Nəqliyyatı Agentliyinin məlumatına əsasən, sərnişinlərin və uçuşların təhlükəsizliyinin təmin edilməsi məqsədilə gecə və səhər saatlarında ölkənin bir neçə şəhərində hava limanlarında müvəqqəti məhdudiyyətlər tətbiq edilib. Təyyarələrin qəbulu və uçuşu dayandırılıb.