Rusiya Avropa İttifaqının nümayəndəliyinin binasını hədəf aldı

Rusiyanın Ukraynaya hücumu nəticəsində ölənlərin sayı 14 nəfərə çatıb.

Bununla bağlı Ukrayna Prezidenti Volodimir Zelenski özünün sosial şəbəkə hesabında məlumat verib.

Zelenskinin sözlərinə görə, ölənlərdən 3 nəfəri uşaqlardır.

Ukraynanın daxili işlər naziri İqor Klimenko qeyd edib ki, Kiyevdə Rusiyanın şəhərə hücumundan sonra dağıntılar altından üç nəfəri sağ çıxarmaq mümkün olub.

Ukrayna Fövqəladə Hallar Dövlət Xidmətindən bildirilib ki, çoxmərtəbəli binaların dağıntıları altında 9 nəfər ola bilər. Ancaq bu insanların mənzillərində olub-olmadıqları dəqiq bilinmir.

Digər bir yandan Ukraynanın xarici işlər naziri Andrey Sibiqa Rusiyanın Kiyevə hücumu nəticəsində Avropa İttifaqının Nümayəndəliyinin binasının zədələndiyini bildirib.

Nazirin sözlərinə görə, Rusiya gecə saatlarında diplomatları hədəfə alıb ki, bu da Vyana Konvensiyasının birbaşa pozulmasıdır: “Bu, təkcə Aİ yox, bütün dünya tərəfindən qınanılmalıdır”.

Ukrayna Aİ nümayəndələri ilə həmrəyliyini və lazımi yardım göstərməyə hazır olduğunu bildirib.