Rusiya bu ərazilərə PUA və raketlər “yağdırdı” | Ukrayna qisasını belə aldı

Rusiya Ordusu iyulun 16-da Ukraynanın şəhər və qəsəbələrinə hücum edib.

Hücumlar əsasən “Şahed” pilotsuz uçuş aparatları və raketlər vasitəsilə həyata keçirilib.

Vinnitsa böyük hücuma məruz qalıb. Mülki infrastruktur hədəf alınıb, yaralılar var. Vilayətin hərbi administrasiyasının sədr müavini Natalya Zabolotnaya bildirib ki, xəsarət alan 7 nəfərdən 5-nin vəziyyəti ağırdır.

Sənaye obyektlərində də partlayışlar baş verib. Xarkova hücum nəticəsində isə 3 nəfər yaralanıb.

Kramatorsk da atəşə tutulub. Çoxmərtəbəli binada yanğın baş verib. İtkilər barədə məlumat verilmir.

Nikolayevin Koblevo kəndində isə mina partlayışı nəticəsində bir nəfər yaralanıb.

Krivoy Roqa 28 kamikadze dron və ballistik raketlə hücum həyata keçirilib. Sənaye şirkəti dağıdılıb. Şəhərdə elektrik enerjisinin verilişi dayandırılıb. Krivoy Roqda bir nəfər yaralanıb.

Son sutka ərzində Ukraynanın silahlı qüvvələri hücumların qarşısını alarkən 1170 rusiyalı hərbçini öldürüb. Bundan başqa, Rusiya Ordusunun 49 artilleriya sistemi məhv edilib.

Rusiya hava hücumundan müdafiə qüvvələri isə Ukraynaya aid 8 dronu zərərsizləşdirib. PUA-lar Krım, Belqorod, Kursk vilayələri və Azov dənizi üzərində vurulub.