Rusiya dronlarla Xarkov sakinlərinə dəhşət yaşatdı | Ölən və yaralananlar var

Rusiya Silahlı Qüvvələri Ukraynanın bir neçə şəhərini və paytaxtı dron və PUA ilə atəşə tutub.

Ölkənin Müdafiə Nazirliyinin məlumatına görə, hava hücumundan müdafiə qüvvələri pilotsuz uçuş aparatlarının əksəriyyətini havadaykən zərərsizləşdirib.

PUA hücumu əsasən Ukraynanın ikinci böyük şəhəri olan Xarkova endirilib. Hadisə nəticəsində bir neçə yaşayış binasına zərər dəyib, güclü yanğın baş verib. 5 dinc sakin dünyasını dəyişib. İkisi uşaq olmaqla ümumilikdə 32 nəfər yaralanıb.

"Əhalinin sıx məskunlaşdığı əraziyə zərbə endirilib. Çoxlu yaşayış binaları zədələnib. 30-a yaxın bina, fərdi evlərə də ziyan dəyib", − Xarkov vilayəti Prokurorluğunun mətbuat katibi Dmitro Çubenko bildirib.

Qeyd edək ki, Xarkovla yanaşı, paytaxt Kiyev, Dnepropetrovsk və Zaparojye də təyyarə tipli PUA-lardan atəşə tutulub. Hücum nəticəsində Kiyevdə yerləşən avtomobil salonunda güclü partlayış baş verib. İki nəfər yaralanıb.