Rusiya dronu Rumıniyada göründü | ”Ukrayna müharibədə uduzmayacaq”

Rumıniya Hərbi Hava Qüvvələri ölkənin hava məkanında Rusiya PUA-sını ələ keçirib.

“86-cı aviabazadan iki “F-16” qırıcısı Rusiyanın Ukrayna hərbi strukturlarına endirdiyi zərbələrdən sonra Ukrayna ilə sərhəddə hava vəziyyətini izləmək üçün sentyabrın 13-də havaya qalxıb”, − deyə məlumatda bildirilib.

Qeyd olunub ki, dron Çiliya Veçedən təxminən 20 kilometr cənub-qərbdə aşkar edilib, bundan sonra o, radarlardan itib.

Məlumata görə, dron yaşayış məntəqələri üzərində uçmayıb və əhalinin təhlükəsizliyinə birbaşa təhlükə yaratmayıb.

Bu arada ABŞ-nin Ukrayna və Rusiya üzrə xüsusi nümayəndəsi Keyt Kelloq Üçüncü Dünya müharibəsi ilə bağlı xəbərdarlıq edib.

O, Rusiya PUA-larının Polşa ərazisinə hücumunu təsadüf hesab etmədiyini, həmçinin Ukraynanın müharibədə uduzmayacağına əmin olduğunu bildirib.

Keyt Kelloq bunu Yalta Avropa Strategiyasının 21-ci İllik Toplantısında deyib.

“19 dron sərhədi keçib. Bu, təsadüf ola bilməz. Ola bilər ki, bir hədəf səhv seçilsin, iki ola bilər, amma 19 yox”, − deyə K.Kelloq qeyd edib.

Onun sözlərinə görə, Rusiya lideri Vladimir Putin məqsədli hərəkət edir:

“O, siqnal göndərir və cavab eşitmək istəyir. Əgər biz tarixdən dərs çıxarmasaq, o zaman Üçüncü Dünya müharibəsinə doğru irəliləyəcəyik”.

O, Rusiyanın müharibədə qalib gəlməyəcəyinə əmindir:

“Ukrayna bu müharibədə uduzmayacaq. Ukraynalıların Rusiya qarşısında mənəvi üstünlüyü var, bu, göz qabağındadır”.