Rusiya MN-dən Ukraynanın hücumu ilə bağlı təcili məlumat

Rusiyanın Kursk vilayətinə daxil olan Ukrayna qoşunları sərhəd zonasında möhkəmlənib.

Rusiya Müdafiə Nazirliyinin məlumatına görə, Ukrayna Silahlı Qüvvələrinin bölmələri Sudjanski rayonunun Nikolaevo-Daryino, Sverdlikovo və Darino kəndlərini işğal edib.

Bildirilir ki, Ukrayna əsgərləri Rılsk-Sudja magistralına da nəzarəti ələ keçirməyə cəhd ediblər. Hətta quru qoşunları Qonçarovkaya ərazisi istiqamətində də müəyyən irəliləyişlərə nail ola bilib.

İki gündür sərhadyanı ərazi sayılan Oleşnya kəndində də döyüşlər gedir. Ukrayna Silahlı Qüvvələri qazın Ukrayna ərazisindən keçməklə Avropaya nəql edildiyi Sudja qazölçmə stansiyasını da ələ keçirib. Amma nəzarət-buraxılış məntəqəsindəki vəziyyətlə bağlı hələ ki heç nə məlum deyil.

İlkin ehtimallara görə, Ukrayna Silahlı Qüvvələrinin bir və ya iki batalyonu Kursk vilayəti ərazisinə daxil olaraq 10 kilometr qərbə doğru irəliləyib. Ümumilikdə, bölgəyə 400-ə qədər Ukrayna hərbçisinin daxil olduğu deyilir. Daha iki minə qədər hərbçi isə sərhəddə cəmlənib.

Avqustun 7-də isə Rusiya Müdafiə Nazirliyi Ukrayna Silahlı Qüvvələrinin Kursk vilayətində irəliləməsinin qarşısının alındığına dair bəyanat yayıb. Rusiya Ordusunun Baş Qərargah rəisi Valeri Gerasimov Prezident Vladimir Putinin Kursk vilayətində vəziyyətlə bağlı güc strukturlarının rəhbərlərinin iştirakı ilə keçirdiyi müşavirədə Ukrayna tərəfdən itkilərin 315 nəfər olduğunu deyib.

“Onlardan azı 100 nəfər ölüb, 215 nəfər yaralanıb. 54 zirehli texnika, o cümlədən 7 tank məhv edilib. Kurskda gedən əməliyyatlar düşməni məğlub etməklə və dövlət sərhədlərinin müdafiəsi ilə başa çatacaq”, – deyə V.Gerasimov bildirib.