Rusiya Ordusu çıxılmaz vəziyyətdə qaldı | Müharibədə vəziyyət dalana dirənib?

Şimali Koreya Rusiyaya əlavə 25-30 min əsgər göndərməyə hazırlaşır.

Bu barədə CNN məlumat yayıb.

Qeyd edək ki, 2024-cü ilin noyabrında 11 min şimali koreyalı hərbçi Rusiyaya göndərilib və onların bir qismi Kurskun müdafiəsində iştirak edib. Bu hərbçilərdən təxminən 4 mini ölüb və ya yaralanıb.

Moskvanın yenə Pxenyandan hərbçi istəməsi Rusiya Ordusunun müharibədə çox itki verdiyinin göstəricisidir. Ukraynaya hücumdan əvvəl pafoslu bəyanatlar verən Rusiyanın Ordusunda əsgər çatışmazlığı var.

Müttəfiqsiz Rusiya təklənir. Moskva özünün yaratdığı Kollektiv Təhlükəsizlik Müqaviləsi Təşkilatından da real dəstək ala bilmir. Buna görə də İran və Şimali Koreya kimi dünyadan təcrid edilmiş ölkələrə möhtac qalıb.

Pxenyanın texnika, silah və qida məhsulları ilə təchizatını Moskva təmin etməsəydi, çətin ki, Şimali Koreya əsgərlərini Rusiya üçün döyüşməyə göndərərdi. Lakin bu, indi həyata keçirilsə də, uzunmüddətli ola bilməz. Çünki Rusiyaya əsgər yardımı Şimali Koreyanın müdafiə qabiliyyətini aşağı salır.

Bundan başqa, ölkədəki demoqrafik vəziyyətə də pis təsir edir. Belə olan halda isə Rusiyanın İran dronları və Şimali Koreya əsgərləri ilə Ukraynadakı savaşda qələbə qazanacağı inandırıcı görünmür.