Rusiya Ordusu daha bir məntəqəni tutdu | Müharibədə son vəziyyət

Dnepropetrovsk vilayətinin Novogeorgiyevka yaşayış məntəqəsində şiddətli döyüşlər gedib.

Rusiya Müdafiə Nazirliyinin yaydığı məlumata görə, yaşayış məntəqəsi ələ keçirilib.

“Reuters” yayılan videonun Novogeorgiyevkada çəkildiyini təsdiqləyib. Binalar və yollar peyk görüntüləri ilə uyğun gəlib. Dnepropetrovskun bu yaşayış məntəqəsi Donetsk vilayətinə yaxın ərazidə yerləşir.

Rusiya Ordusu Dnepropetrovskun şərqində irəliləyib. ABŞ-nin dəyərləndirmələrinə görə, Rusiya vilayətin cəmi 1 faizinə nəzarət edir. Rusiya Ordusu isə bu vilayətdə ilk kəndi tutduğunu iyul ayında açıqlayıb.

Onu da deyək ki, Rusiya bu vilayətə iddialı deyildi. Daha dəqiq desək, Rusiyanın ələ keçirmək istədiyi Ukraynanın 5 vilayəti arasında Dnepropetrovskun adı hallanmırdı. Moskvanın tam və qismən ələ keçirdiyi ərazilər Krım, Donetsk, Luqansk, Xerson və Zaporojyedir.

Bununla yanaşı, Rusiya Zaporojyenin Ukraynanın nəzarətində olan hissəsini atəşə tutub. Novodanilovka kəndi hədəf alınıb, artilleriya zərbələrindən sonra 46 yaşlı qadın ölüb.

Bu arada, Böyük Britaniyanın Müdafiə Nazirliyi məlumat yayıb ki, Rusiyada dronların idarə olunması tədris proqramına salınır. 500 məktəb və 30 kollecdə təhsil alanlar praktiki hazırlıq keçirlər. Bunun üçün 2500 müəllim hazırlanıb və 2030-cu ilə qədər bir milyon PUA mütəxəssisinin formalaşdırılması planlaşdırılır.