Rusiya Ordusu Ukrayna vilayətlərini atəşə tutdu

Ukraynanın cənubundakı Odessa şəhərində partlayış səsləri eşidilib.

Bu barədə şəhərin meri Gennadi Truxanov məlumat verib. Dron qruplarının Odessaya Qara dənizdən uçduğu bildirilir.

Avqustun 4-nə keçən gecə Ukraynanın həmçinin Jitomir, Sumı, Çerniqov, Xarkov, Poltava, Kiyev vilayətlərinə PUA hücumları qeydə alınıb, hava hücumu sirenləri işə düşüb.

Ukrayna Hərbi Hava Qüvvələri Komandanlığının məlumatına görə, silahlı qüvvələr Rusiyanın “İsgəndər-M” ballistik raketi də daxil olmaqla 61 hava hədəfini vura bilib.

Ötən gecə Rusiya hava hücumundan müdafiə sistemləri ölkənin regionlarına hücuma cəhd edən Ukrayna Silahlı Qüvvələrinin iki HIMARS mərmisi və Ukraynanın 274 pilotsuz uçuş aparatını vurub.

Rusiya Müdafiə Nazirliyi məlumat yayıb ki, hava hədəflərinin əksəriyyəti Qara dəniz üzərində, Voronej vilayətində və Krımda vurulub. Bu ərazilərdə ümumilikdə 41 pilotsuz uçuş aparatı məhv edilib.