Rusiya təslim olmalı olacaq? - Tramp Putinin niyyətini başa düşdü

Rusiya Prezidenti Vladimir Putin ABŞ Prezidenti Donald Trampın səbrini sınamağa davam edir. V.Putin davamlı olaraq Ukrayna ilə bağlı sülh mesajları versə də, rus qoşunları Ukraynada mülki hədəflərə zərbələr endirir.

Bu barədə britaniyalı tarixçi, jurnalist Uoen Metyus “The Telegraph”a yazdığı məqaləsində qeyd edib.

Onun fikrincə, V.Putin D.Trampı ciddi qəbul etmədiyindən onunla manipulyasiya edir.

U.Metyus onu da bildirib ki, V.Putin Ukraynada sülh istəmir və ona görə də müntəzəm olaraq gecə vaxtı raketlərlə Krivoy Roqa, Suma, Xarkova, Kiyevə və digər şəhərlərə zərbələr endirir.

O əlavə edib ki, artıq D.Tramp da V.Putinin sülh istəmədiyindən şübhələnməyə başlayıb. ABŞ Prezidenti artıq bir neçə dəfə buna eyham vurub, narazılığını bildirib. Bu səbəbdən də D.Tramp V.Putini Rusiyaya qarşı ikinci dərəcəli sanksiyalar tətbiq etməklə hədələyib.

Onun sözlərinə görə, V.Putin buna ciddi yanaşmalıdır, çünki enerji qiymətlərinin düşməsi artıq Rusiyanın hərbi iqtisadiyyatına təzyiq göstərir.

O hesab edir ki, Hindistan, Çin və Avropa İttifaqına rus neftinin ixracını dayandırmaq üçün Vaşinqtonun birgə təzyiqi sadəcə olaraq dağıdıcı olacaq.

"V.Putin əmindir ki, D.Tramp heç vaxt ABŞ-nin ona qarşı tam maliyyə və tənzimləmə gücündən istifadə etməyəcək", – jurnalist vurğulayıb.

U.Metyusun fikrincə, Rusiya, böyük ehtimalla, sülh prosesini son dəqiqəyə qədər uzatmağa çalışacaq və bununla da Ukrayna ilə ABŞ arasında ziddiyyət yaratmağa çalışacaq. O həmçinin istisna etmir ki, D.Tramp Moskvaya qarşı təhdidlərini həyata keçirərsə, V.Putin təslim olmaq məcburiyyətində qalacaq.