Rusiya-Ukrayna cəbhəsində şiddətli döyüşlər gedir

Rusiya son 24 saat ərzində qüvvələrinin Xarkov və Zaporojye vilayətlərində iki yaşayış məntəqəsini nəzarətə götürdüyünü açıqlayıb.

Rusiya Müdafiə Nazirliyinin hesabatında qeyd edilib ki, Ukrayna Silahlı Qüvvələrinin hərbi aerodromları, enerji infrastrukturu obyektləri və uzaqmənzilli pilotsuz uçuş aparatlarının buraxılış məntəqələri vurulub.

Əlavə olaraq Rusiya hava hücumundan müdafiə bölmələri 312 ədəd sabitqanadlı pilotsuz uçuş aparatını vurub. 

Ukrayna Silahlı Qüvvələrinin Baş Qərargahından isə bildirilib ki, son 24 saat ərzində cəbhə xətti boyunca 147 döyüş toqquşması baş verib.

Açıqlamada deyilir ki, Ukrayna Ordusu müxtəlif istiqamətlərdə Rusiya qüvvələrinə şəxsi heyət və texnika baxımından ciddi itkilər verdirib. Bundan əlavə, Ukrayna qoşunları Rusiya qüvvələrinin şəxsi heyət və texnikasının toplandığı üç əraziyə, eləcə də bir pilotsuz uçuş aparatının idarəetmə məntəqəsinə zərbə endirib və 2 400-dən çox pilotsuz uçuş aparatını vurub.

Ukrayna Prezidenti Volodimir Zelenski bildirib ki, Ukrayna Rusiya ilə pravoslav Pasxası münasibətilə atəşkəsin elan olunmasına hazırdır.

Onun sözlərinə görə, Ukrayna istənilən münaqişənin ölkənin ləyaqətinin və müstəqilliyinin qorunması şərtilə sona çatdırılması formatını, o cümlədən tam atəşkəsi və enerji infrastrukturu obyektlərinə zərbələrin dayandırılmasını dəstəkləyir.