Rusiya Ukrayna ilə bağlı ittiham irəli sürdü

“Ukrayna Silahlı Qüvvələri Böyük Britaniyanın köməyi olmadan Bryansk şəhərinə zərbə endirə bilməzdi”.

Bunu Kremlin sözçüsü Dmitri Peskov bildirib.

O, Moskvada keçirilən brifinqdə qeyd edib ki, hücum zamanı istifadə olunan “Storm Shadow” raketlərinin buraxılması britaniyalı mütəxəssislər olmadan mümkün deyil.

Onun sözlərinə görə, Rusiya bunu diqqətdə saxlayır. Peskov həmçinin vurğulayıb ki, Rusiyanın Ukraynada apardığı xüsusi hərbi əməliyyatın məqsədlərindən biri Kiyevi silahsızlaşdırmaq və bu cür hücumlar həyata keçirmək imkanından məhrum etməkdir.

Qeyd edək ki, martın 10-da Ukrayna Silahlı Qüvvələri Bryansk şəhərində inzibati binaya raket zərbəsi endirib. Nəticədə 7 nəfər həlak olub, 40-dan çox insan yaralanıb. Bundan əlavə, Ukrayna hücum zamanı raket komponentləri istehsal edən əsas zavodun vurulduğunu bildirib. Rusiya isə Kiyevi mülki şəxsləri hədəf almaqda ittiham edib.