Rusiya Ukraynaya 650 dronla hücum edib

“Dekabrın 23-ü gecədən etibarən səhərə qədər Rusiya Ukraynaya genişmiqyaslı hücum həyata keçirib, enerji obyektlərimizə, mülki infrastruktura zərər vurmaq üçün 650-dən çox dron istifadə olunub, 30-dan çox raket atılıb”.

Bu barədə Ukrayna Prezidenti Volodimir Zelenski “Telegram” kanalında məlumat paylaşıb.

O bildirib ki, səhər saatlarında Ukraynanın əksər ərazilərində hava həyəcanı siqnalı səsləndirilib.

“Zərbələrin nəticələrinin aradan qaldırılması üçün bütün zəruri xidmətlər cəlb olunub. Təəssüf ki, itkilər var. Kiyev vilayətində Rusiya dronunun zərbəsi nəticəsində bir qadın həlak olub. Xmelnitski vilayətində də bir nəfər ölüb. Jitomir vilayətində isə 4 yaşlı uşaq Rusiya dronunun yaşayış binasına düşməsi nəticəsində həyatını itirib”, – Ukrayna Prezidenti qeyd edib.

Ümumilikdə ən azı 13 vilayətin ərazisinin Rusiya Ordusunun hücumlarına məruz qaldığını bildirən Zelenski dronların və raketlərin böyük hissəsinin vurulduğunu qeyd edib:

“Rusiyanın bu hücumu açıq şəkildə Kremlin prioritetlərini göstərir. Hücum Milad bayramı ərəfəsində edilib, insanlar, sadəcə, ailələri ilə birlikdə evdə və təhlükəsiz olmaq istədiyi vaxtda. Eyni zamanda hücum müharibəni başa çatdırmaq üçün aparılan danışıqların ortasında baş verib”.

Zelenski bu hücumlara son qoymaq üçün Rusiyanı sülhə və təhlükəsizlik zəmanətinə məcbur etməyin vacibliyini vurğulayıb.

Rusiya Müdafiə Nazirliyindən isə bildirilib ki, gecə ərzində Hava Hücumundan Müdafiə qüvvələri Ukraynaya məxsus 22 PUA məhv edib.