Rusiya və ABŞ liderləri bu məsələ ilə bağlı razılığa gəldi

Rusiya Prezidenti Vladimir Putin və amerikalı həmkarı Donald Tramp arasındakı telefon danışığının detalları məlum olub.

Liderlər şəxsi görüşlərin təşkili barədə razılığa gəliblər. Bu barədə Kremlin yaydığı məlumatda bildirilib.

“Tramp ABŞ-nin əldə olunmuş bütün razılaşmaları yerinə yetirəcəyini dilə gətirib. Ukraynada nizamlanma mövzusu da müzakirə olunub.

Donald Tramp hərbi əməliyyatların tezliklə dayandırılması və problemin sülh yolu ilə həllinin tərəfdarı olduğunu bildirib. Vladimir Putin isə öz növbəsində münaqişənin köklü səbəblərini aradan qaldırmağın zəruriliyini qeyd edib. O, Donald Trampla razılaşıb ki, uzunmüddətli nizamlanmaya sülh yolu ilə nail olmaq olar.

Söhbət zamanı Yaxın Şərqdəki vəziyyətin nizamlanması, İranın nüvə proqramı, eləcə də iqtisadi sahədə ikitərəfli Rusiya-Amerika münasibətləri mövzularına da toxunulub.

Rusiya Prezidenti Trampı Moskvaya səfərə dəvət edib və ABŞ rəsmilərini Rusiyada qarşılıqlı maraq doğuran sahələr, o cümlədən Ukraynadakı vəziyyətin nizamlanması ilə bağlı qəbul etməyə hazır olduğunu bildirib. Vladimir Putin və Donald Tramp şəxsi görüşlərin təşkili də daxil olmaqla, təmasların davam etdirilməsi barədə razılığa gəliblər”, – deyə Kremlin məlumatında qeyd olunub.