Rusiya və ABŞ liderlərinin görüşü barədə anons verildi | Kremldən mühüm açıqlama

Kremlin sözçüsü Dmitri Peskov ABŞ Prezidenti Donald Trampla Rusiya Prezidenti Vladimir Putin arasında baş tutan telefon danışığının nəticələri barədə açıqlama verib.

O, müsahibəsində bildirib ki, dövlət başçılarının telefon danışığı zamanı onların özlərinin təmaslarını davam etdirəcəkləri, həmçinin müvafiq işə başlamaları üçün dərhal köməkçilərinə tapşırıqlar verəcəkləri barədə razılığa gəlinib.

D.Peskov vurğulayıb ki, D.Tramp səfər razılaşdırılacağı halda istənilən zaman Rusiyaya gələ bilər.

Dmitri Peskov 9 May – Rusiyada qeyd olunacaq Qələbə Günü münasibətilə bayram tədbirində istənilən xarici ölkə liderini görməkdən şad olacaqlarını da söyləyib.

Müsahibədə vurğulanıb ki, bundan sonra ABŞ ilə Rusiya arasında danışıqlar ancaq sülh barəsində olacaq, müharibədən söhbət gedə bilməz:

“ABŞ-nin əvvəlki administrasiya ilə nə baş verdi? Dialoq yox idi, sona qədər müharibə oldu. Prezident Donald Trampın bəyanatlarına əsasən, biz problemləri dialoq yolu ilə həll edirik, müharibə ilə yox, bizə sülh lazımdır. Belə bir mövqe ilə nəzəri olaraq hər bir sağlam düşüncəli insana və ya dövlətə daha çox müraciət olunmalıdır. Rusiya və ABŞ kimi nəhəng dövlətlərin liderlərinin görüşünə xüsusi hazırlığın aparılması vacibdir”.

D.Peskov əlavə edib ki, indiki vəziyyətdə Donald Trampla Vladimir Putin arasında baş tutacaq ilk potensial təmas hər iki ölkə üçün çox əhəmiyyətlidir.