Rusiya və Gürcüstan arasında qalmaqal | Müharibə ittihamı aləmi bir-birinə qatdı

Rusiyanın BMT-dəki Daimi Nümayəndəliyinin rəhbərinin müavini Dmitri Polyanskinin 2008-ci il müharibəsi ilə bağlı sözləri diqqət çəkib.

Polyanski 2008-ci il müharibəsi ilə bağlı Gürcüstanın mövqeyini səsləndirib. O, xüsusilə hakim “Gürcü Arzusu” Partiyasının eks-prezident Mixeil Saakaşvilinin müharibəni necə başlatması barədə dediklərindən sitat gətirib:

“Qərbli həmkarlarımızın Saakaşvilinin Cənubi Osetiyaya 2008-ci ildə aqressiyasını müzakirə etməklə bağlı manyak arzuları bizi çox təəccübləndirib. Gürcüstan hökumətinin də mövqeyi nəzərə alınaraq açılan faktlar bizə daha çox mazoxizmi xatırladır. Mən daha şərh verməyəcəyəm. Sadəcə sizə hakim “Gürcü Arzusu” Partiyasının İdarə Heyətinin bəyanatını oxuyacağam”.

Bundan sonra “Gürcü Arzusu”nun ötən gün yaydığı bəyanatdan Saakaşvilinin 2008-ci il müharibəsinin təqsirkarı olması ilə bağlı hissəsi oxunub:

“Gürcü ictimaiyyətinin böyük hissəsi Saakaşvilinin adekvatlığına şübhə edir. Fakt odur ki, 2008-ci ilin avqustunda Saakaşvilinin avantürist fəaliyyətləri onun psixi balanssızlığının nəticəsi yox, xaricdən aldığı və yaxşı planlaşdırılmış xəyanətin nəticəsi idi”.

Polyanski deyib ki, qərbli diplomatlar tribunaya çıxıb danışanda bu bəyanatı yenidən yada salsınlar.