Rusiya XİN erməni vandalizmini pislədi

Rusiya İrəvanda mühasirədə olan Leninqrad uşaqlarının xatirəsinə ucaldılan abidə ilə bağlı törədilən vandalizm aktını qətiyyətlə pisləyir və bildirir ki, bu cür nalayiq hərəkətlər Ermənistanda Rusiyanı ləkələmək məqsədilə başladılan ictimai kampaniyanın davamı üçün şərait yaradır.

Bu barədə Rusiya Xarici İşlər Nazirliyinin sözçüsü Mariya Zaxarovanın şərhində deyilir.

“Yanvarın 29-da İrəvanda mühasirədə olan Leninqrad uşaqlarının xatirəsinə ucaldılan abidə ilə bağlı törədilən vandalizm aktını qətiyyətlə pisləyirik. Dərin təəssüflə qeyd edirik ki, bu, Rusiya və Ermənistan üçün ümumi olan tarixin qəhrəmanlıq səhifələrinə həsr olunmuş abidələrin ilk dəfə təhqir olunması halı deyil. Biz Ermənistan hakimiyyətindən gələcəkdə bu cür barbarlıq təzahürlərinin qarşısının alınmasını gözləyirik”, – deyə Rusiya XİN-in saytında dərc olunan şərhdə bildirilib.

Qeyd edək ki, sosial şəbəkələrin erməni seqmentində bir şəxsin abidəyə qoyulan gülləri yerə atdığını, Rusiya bayrağının rənglərini əks etdirən lentləri tapdaladığını əks etdirən görüntü yayılıb. Daha sonra Ermənistanın Baş Prokurorluğu abidənin təhqir olunması ilə bağlı onlara müvafiq müraciətin daxil olduğunu və bununla bağlı qanun çərçivəsində tədbir görüləcəyini bildirib.