Rusiya Yaponiyaya niyə etiraz etdi?

Rusiya Yaponiyaya genişmiqyaslı hərbi təlimlərlə bağlı etirazını bildirib.

Buna səbəb oktyabrın 20-dən 31-dək Rusiya sərhədi yaxınlığında yerləşən Hokkaydo adası da daxil olmaqla, bütün Yaponiyanı əhatə edən genişmiqyaslı "Joint Exercise 2025" hərbi təlimlərinin keçirilməsi olub.

Məsələ ilə bağlı Yaponiyanın Moskvadakı səfirliyinə kəskin etiraz bildirilib. Bu barədə Rusiya Xarici İşlər Nazirliyinin bəyanatında deyilir.

Nazirlik bu cür hərbi fəaliyyətin ölkənin uzaq şərq sərhədlərinin təhlükəsizliyinə potensial təhdid yaratdığını qeyd edib.

Moskva xüsusən Yaponiyanın İvakuni bazasında orta və qısamənzilli raketlərin buraxılması üçün nəzərdə tutulmuş "Tayfun" raket sistemi batareyasının yerləşdirilməsinə görə narahatlığını bildirib.

Kompleks sentyabrın 11-dən 25-dək keçirilmiş "Resolute Dragon 25" birgə Yaponiya-ABŞ təlimləri başa çatdıqdan sonra bazada saxlanılmışdı. Rusiya öz təhlükəsizliyini təmin etmək üçün lazımi tədbirlər görmək hüququnu özündə saxladığını vurğulayıb.