Rusiyada gərginlik: Döyüş üçün atəş əmri verildi

Rusiyanın Rostov şəhər polisi “Qala” planı barədə elan verib. Şəxsi heyətə isə tam hazırlıq vəziyyətində olmaları tapşırılıb. Bu barədə sosial şəbəkənin Rusiya seqmentində məlumat verilib.

“Daxili İşlər Nazirliyinin, Rusiya Qvardiyasının bütün heyətinin döyüş hazırlığı vəziyyətinə gətirilməsi, həmçinin Luqansk və Donetsklə sərhəddəki postların gücləndirilməsi barədə əmr verilib”, – deyə bildirilib.

“Baza”nın məlumatına görə, Rostov vilayətinin bir sıra polis idarələrində işçilərə xəbərdarlıq edilib və səbəb barədə açıqlama verilməyib. Federal Təhlükəsizlik Xidmətinin Moskva departamenti də həyəcan siqnalı ilə ayağa qaldırılıb. Bu barədə BBC-nin xüsusi xidmət orqanlarına yaxın mənbə məlumat verib.

Qeyd olunub ki, “Don” şossesində FTX-nin Milli Qvardiya qoşunlarının xüsusi çevik reaksiya bölmələrinin dəstəyi ilə yollarda blokpostlar qurulub. Postlarda növbə çəkənlərə isə təhlükə olacağı təqdirdə atəş açmaq əmri verilib. Eyni zamanda texnika da hazırlıq rejimindədir, lakin bölmələr hələ ki texnikanın çıxarılması ilə bağlı əmr almayıblar.