Rusiyada gərginlik pik həddə | Ukrayna Ordusu bu rayonda da...

Rusiyanın Kursk vilayətində döyüş zonasının miqyası ötən günlərlə müqayisədə daha da genişlənib.

Bu barədə ölkənin Müdafiə Nazirliyi NASA-nın peyk məlumatlarına istinadən məlumat yayıb.

Xəbərdə bildirilib ki, hazırda Sudjanski vilayəti qaynar nöqtə olaraq qalır. Eyni zamanda Rusiya hakimiyyəti etiraf edib ki, Ukrayna Silahlı Qüvvələri qonşu Belovski rayonunda da reyd keçirir.

Avqustun 11-nə qədər olan statistikaya görə, döyüşlərin getdiyi ümumi ərazi 720 kvadratkilometrə qədər olub. Bu, əvvəlki günlə müqayisədə 70 kvadratkilometr çoxdur.

Bu arada Kursk vilayətinin Belovski rayonunun rəhbəri Nikolay Volobuev sakinləri könüllü olaraq təxliyə etməyə çağırıb.

Yerli medianın məlumatına görə, sözügedən bölgədə vəziyyət gərgin olaraq qalır. Bildirilib ki, bundan əvvəl Rusiya Müdafiə Nazirliyi bir gecədə Kursk vilayəti üzərində Ukrayna Silahlı Qüvvələrinə məxsus 11 PUA-nı zərərsizləşdirib.

Xatırladaq ki, avqustun 6-da ukraynalı əsgərlər sərhədi keçərək Kursk vilayətinə daxil olub. Avqustun 8-də Rusiya Müdafiə Nazirliyi Sudjanski və Korenevski rayonlarında döyüşlərin getdiyini bildirib. Avqustun 9-da axşam saatlarında Belqorod, Bryansk və Kursk vilayətlərində antiterror əməliyyatı rejimi tətbiq edilib.