Rusiyada matəm elan olundu | Ölümə səbəb olan faciənin detalları

Ukrayna Silahlı Qüvvələrinin avqustun 15-i Rusiyanın Ryazan vilayətinin Şilov rayonunda yerləşən “Elastik” zavodunun barıt sexinə atəş açması nəticəsində baş verən partlayışda həlak olanların sayı artıb.

Bu barədə Regional Əməliyyat Qərargahının mətbuat xidməti məlumat yayıb.

“Dağıntılar altından 3 nəfər xilas edilib. Ölənlərin sayı 11 nəfərə çatıb”, – deyə məlumatda bildirilir.

Hadisə nəticəsində 130 nəfər xəsarət alıb, onlardan 29-u xəstəxanaya yerləşdirilib. Zərərçəkənlərə zəruri tibbi yardım göstərilib. Partlayışın fəsadlarının aradan qaldırılması istiqamətində işlər davam etdirilir.

İstintaq Komitəsi sənaye təhlükəsizliyi tələblərinin pozulması ilə bağlı cinayət işi açıb. Müəssisənin yerləşdiyi Şilov rayonunda fövqəladə vəziyyət rejimi tətbiq edilib.

Məlumat üçün bildirək ki, Ryazan vilayətinin qubernatoru Pavel Malkov Şilov rayonunda baş vermiş genişmiqyaslı partlayışla bağlı matəm günü elan edilməsi haqqında sərəncam imzalayıb. Avqustun 18-də bütün bölgədə bayraqlar endiriləcək.

Rusiya Müdafiə Nazirliyindən isə bildirilib ki, avqustun 16-sı gecə ərzində ölkənin Hava Hücumundan Müdafiə qüvvələri Ukraynaya məxsus təyyarə tipli 29 PUA məhv edib.

Bununla yanaşı, Ukrayna Müdafiə Nazirliyindən verilən məlumata görə, gecə ərzində Rusiya Silahlı Qüvvələri də ölkə ərazisini dəfələrlə PUA və “İskəndər-M” ballistik raketləri ilə atəşə tutub.

Ukrayna Hava Hücumundan Müdafiə qüvvələrinin məlumatına əsasən, Rusiyaya məxsus 85 PUA-dan 61-i məhv edilib. Əsasən Sumı, Donetsk, Çerniqov və Dnepropetrovsk vilayətləri atəşə tutulub.