Rusiyada raket yanacağı zavodu və dəniz dronları bazası vuruldu

Ukrayna Müdafiə Qüvvələri Rusiyadakı raket yanacağı istehsal edən zavoda, həmçinin Krımda dəniz pilotsuz aparatları bazasına və sursat anbarlarına zərbələr endiriblər.

Bu barədə “RBK-Ukrayna” Ukrayna Silahlı Qüvvələri Baş Qərargahının “Telegram” kanalına istinadən məlumat yayıb.

Qeyd olunub ki, Rusiyanın Tula vilayətinin Yefremov şəhərində plastik partlayıcı maddələrin və bərk raket yanacağının komponentlərinin istehsalında ixtisaslaşan “Yefremov sintetik kauçuk zavod”u zərər çəkib. İstehsalat ərazisində partlayışlar və irimiqyaslı yanğın olub.

Bundan əlavə, Rusiyanın logistikasını pozmaq məqsədilə Ukrayna Müdafiə Qüvvələri Luqansk əyalətinin Doljansk şəhərində alay səviyyəli maddi-texniki vasitələr anbarına zərbə endiriblər. Həmçinin Ukraynanın müvəqqəti işğal olunmuş ərazilərində Rusiyanın Hava Hücumundan Müdafiə obyektlərinə və canlı qüvvənin cəmləşdiyi ərazilərə zərbələr endirilib.