Rusiyanın AZAL təyyarəsini vurduğu "Pantsir-S1" sistemi Ukrayna qarşısında acizdir? | HƏRBİ XRONİKA

“Hərbi xronika” rubrikasının budəfəki buraxılışında Ukrayna-Rusiya müharibəsində Rusiyanın “Pantsir-S1” Hava Hücumundan Müdafiə sistemlərinin məhv edilməsi məsələsi müzakirə olunub.

Bildirilib ki, 2025-ci ilin əvvəlindən Ukrayna müdafiə qüvvələri Rusiyanın bu komplekslərinin təxminən yarısını məhv edib.

Ukrayna Təhlükəsizlik Xidmətinin keçmiş rəhbəri Vasili Malyuk qeyd edib ki, bu itkilər Rusiyanın silah istehsalının məhdud imkanları ilə bağlı narahatlıq yaradır.

“Pantsir-S1” zenit-raket və zenit-artilleriya sistemi, 30 millimetrlik toplar və 12 idarə olunan raketlə təchiz edilib və Rusiya Ordusunun ən güclü silahlarından biri sayılırdı. Lakin Ukrayna qüvvələri pilotsuz uçuş aparatları və dəqiq idarə olunan sursatlar vasitəsilə bu sistemi məhv etməyə müvəffəq olub.

V.Malyukun sözlərinə görə, "Pantsir" sistemlərinin məhv edilməsi xüsusilə strateji bölgələrdə Rusiya Hava Hücumundan Müdafiə sistemini zəiflətmək məqsədilə məqsədyönlü bir strateji addımdır.

Qeyd olunub ki, Ukraynanın dronları həm taktiki, həm də strateji əhəmiyyət kəsb edən zərbələr həyata keçirərək Rusiyanın müdafiə qabiliyyətini zəiflədir.