Rusiyanın bu əraziləri atəşə tutuldu, gərginlik artdı | Yaralananlar var

Rusiya hava hücumundan müdafiə qüvvələri oktyabrın 29-dan 30-na keçən gecə federasiya ərazisində Ukrayna Silahlı Qüvvələrinə məxsus 23 PUA-nı məhv edib.

Bu barədə ölkənin Müdafiə Nazirliyi məlumat yayıb.

Bildirilib ki, PUA-lardan 7-si Rostov, 5-i Kursk, 4-ü Smolensk, 3-ü Orlov, 3-ü Bryansk və 1-i Belqorod vilayətində məhv edilib.

Belqorod vilayətinin qubernatoru Vyaçeslav Qladkov “Telegram” kanalında bildirib ki, Ukrayna Silahlı Qüvvələri Otradnoye kəndində iki yaşayış məntəqəsinə hücum edib. Nəticədə 3-ü qadın olmaqla 4 nəfər yaralanıb. Həmçinin ticarət obyektlərinə ziyan dəyib.

Qeyd edək ki, Rusiya Silahlı Qüvvələri də gecə ərzində 60-dan çox “Şahed” tipli PUA-larla Ukraynaya hücum edib. Bu barədə ölkə mətbuatında məlumat verilib.

Bildirilib ki, PUA-ların əksəriyyəti paytaxt Kiyevə atılıb. Hücum nəticəsində yaşayış binalarına ciddi ziyan dəyib.