Rusiyanın maraqları nəzərə alınmasa, nələr baş verəcək? | Lavrovdan açıqlama

Rusiya Ukrayna ilə danışıqları istənilən formatda davam etdirməyə hazırdır, amma mümkün yüksək səviyyəli görüş danışıqlar prosesinə nöqtə qoymalıdır.

Bu barədə Rusiyanın xarici işlər naziri Sergey Lavrov avqustun 20-si keçirilən mətbuat konfransında bildirib.

O əlavə edib ki, Rusiyanın maraqları nəzərə alınmasa, irəliləyişə nail olmaq mümkün deyil:

“Biz təhlükəsizlik zəmanətlərinin etibarlı olmasının tərəfdarıyıq və bu mövzuda çox yaxşı bir nümunəmiz var. 2022-ci ildə İstanbulda olduğu kimi. Ukraynanın təhlükəsizlik təminatları məsələsində İstanbulda aparılmış danışıqlarda əldə olunan nəticələrə əsaslanmaq lazımdır. Təklif olunur ki, kollektiv təhlükəsizlik məsələləri Rusiya olmadan qəbul edilsin.

Bununla razı ola bilmərik. Biz öz hüquqi maraqlarımızın üzərində kəskin şəkildə dayanırıq. Mən əminəm ki, ABŞ-də çox gözəl anlayırlar ki, Rusiya olmadan təhlükəsizlik təminatlarını ciddi şəkildə müzakirə etmək “dalana aparan yol”dur”.

Sergey Lavrov əlavə edib ki, Rusiya Prezidenti Vladimir Putin amerikalı həmkarı Donald Trampla telefon danışığı zamanı təkcə danışıqları davam etdirməyi deyil, həm də nümayəndə heyətləri başçılarının səviyyəsinin yüksəldilməsi barədə düşünməyi təklif edib.