Rusiyaya getmək istəyənlərə xəbərdarlıq edildi

ABŞ Dövlət Departamentinin Mətbuat Xidmətinin rəhbəri Metyu Miller ölkə vətəndaşlarına Rusiyaya getməmək barədə xəbərdarlıq edib. Bu barədə o, fevralın 21-də keçirdiyi brifinqdə deyib.

Onun sözlərinə görə, amerikalılar Rusiyaya səfər edəcəyi təqdirdə həbs oluna bilərlər.

"Təəssüf hissi ilə bildirmək istəyirəm ki, Rusiya öz vətəndaşları ilə yanaşı, Amerika vətəndaşlarını da saxlamağa davam edir. Buna görə də biz açıq şəkildə bildiririk ki, heç bir Amerika vətəndaşı hər hansı səbəbdən Rusiyaya səfər etməməlidir, çünki onlar Rusiya hökuməti tərəfindən saxlanılma, həbs olunma riski ilə üzləşə bilərlər.

Bundan əlavə, biz saxlanılan amerikalıları ölkəyə geri qaytarmaq üçün fəaliyyətimizi davam etdirəcəyik. Biz haqsız olaraq həbs olunan Amerika vətəndaşlarını azad etmək üçün çalışmaqda və hər kəs üçün humanist rəftarın çağırışını etməkdə davam edəcəyik. Lakin düşünürəm ki, insanlar öz vətəndaşlarını və başqa ölkələrin vətəndaşlarını cəzalandırmağa hazır olan rejimin nə qədər qəddar olduğunu bir daha xatırlamalıdırlar. Təkrar edirəm, əgər hər hansı bir səbəbdən Rusiyaya səfər etməyi düşünürsünüzsə, bunu etməyin", – deyə o bildirib.