Rusiyaya məxsus bu layihənin dəyəri 12,5 milyard dollardır

Macarıstanda Rusiyanın inşa etdiyi “Pakş-2” atom elektrik stansiyasında ilk betonun tökülməsi baş tutub.

Bu barədə Macarıstanın xarici işlər naziri Peter Siyarto məlumat verərək bildirib ki, bununla da obyekt Beynəlxalq Atom Enerjisi Agentliyinin (BAEA) standartlarına görə rəsmi olaraq tikilməkdə olan AES statusu alıb.

12,5 milyard avro dəyərində olan layihə ciddi gecikmələrə baxmayaraq, tender keçirilmədən Rusiyanın dövlət nüvə şirkəti “Rosatom”a həvalə edilib.

Layihə tez-tez Macarıstanın Baş naziri Viktor Orban ilə Rusiya Prezidenti Vladimir Putin arasındakı yaxın münasibətlərin göstəricisi kimi qiymətləndirilir.

Pakş şəhərində keçirilən rəsmi mərasimdə çıxış edən Siyarto bildirib ki, “Pakş-2”nin istismara verilməsi Macarıstanın elektrik enerjisi tələbatının 70 faizini nüvə enerjisi hesabına ödəməyə imkan verəcək və ölkənin beynəlxalq enerji bazarlarından asılılığını əhəmiyyətli dərəcədə azaldacaq.