Saakaşvilinin yaşama ehtimalı azalır

Tbilisi klinikalarından birində müalicə alan Gürcüstanın keçmiş prezidenti Mixeil Saakaşvilinin vəziyyəti kritikdir.

Ölkənin Ombudsman Aparatının konsultasiyasının həkimi Giorgi Qriqoliya jurnalistlərə açıqlamasında bildirib ki, Saakaşvilinin arıqlaması davam edərsə, geri dönməz proseslər başlayacaq.

“Saakaşvilinin başına gələnlər təbiidir: o, arıqlayır, əzələ və artıq sümük toxumasının məhv edilməsi prosesi gedir. Bu, onun adekvat müalicə almaması səbəbindən baş verir”, - deyə G.Qriqoliya bildirib. Onun sözlərinə görə, əgər siyasətçinin çəkisi 55 kiloqrama düşərsə, o zaman geri dönməz proseslər başlayacaq.

Ombudsman Aparatının həkimləri fevralın 19-da M.Saakaşvilini müayinə ediblər. Həkimlər qrupunun rəsmi rəyində deyilib ki, xəstədə tarazlıq və koordinasiya itkisi, psixi funksiyaların azalması, bədən toxumalarının öz-özünə parçalanması prosesi və bir sıra digər ciddi pozuntular başlanıb.