Sankt-Peterburqda kafedə güclü partlayış

Rusiyanın Sankt-Peterburq şəhərinin mərkəzində güclü partlayış baş verib. Bu barədə ölkənin Fövqəladə Hallar Xidmətindən məlumat verilib.

Hadisə universitet sahilində yerləşən “Street bar” adlı kafedə olub: 1 nəfər ölüb, 15 nəfər yaralanıb. İlkin məlumata görə, içəridə hərbi jurnalist Vladlen Tatarskinin görüşü keçirilirmiş. Nəticədə o, həyatını itirib.

Ehtimal olunur ki, partlayıcı kafeyə bir qız tərəfindən keçirilib. İçində bomba olan heykəlcik Vladlen Tatarskiyə veriləndə partlayış baş verib. Hüquq-mühafizə orqanları hərbi jurnalistə heykəlciyi verən qadının ilkin fotosunu da yayıb.

Qeyd edək ki, V.Tatarskinin bundan əvvəl təhdid dolu videogörüntüləri yayılmışdı. Görüntülərdə onun ukraynalıları nəzərdə tutaraq “hamınızı öldürəcəyik, qarət edəcəyik” sözləri yer alıb. Hazırda aidiyyəti qurumlar insidentin təfərrüatlarını araşdırırlar.