Savaş qlobal müharibəyə çevrilir? - ABŞ-nin hücumu dünyada əks-səda yaratdı

ABŞ-nin İrana qarşı həyata keçirdiyi genişmiqyaslı hərbi hücumlar beynəlxalq aləmdə ciddi narahatlıqla qarşılanmaqdadır.

Ciddi reaksiya verən ilk ölkələrdən biri isə Pakistan olub.

Pakistan parlamentinin Müdafiə Komitəsinin sədri çıxış edərək, ABŞ-nin bu addımını açıq şəkildə “hərbi cinayət” adlandırıb.

Komitə rəhbərinin sözlərinə görə, ABŞ-nin İrana qarşı tətbiq etdiyi güc beynəlxalq hüququn və BMT Nizamnaməsinin əsas prinsiplərinin kobud şəkildə pozulması deməkdir.

“Bu cür birbaşa hərbi müdaxilə beynəlxalq hüquq normalarını ayaq altına atmaqla yanaşı, bölgədə yeni və daha təhlükəli müharibələrin başlanğıc nöqtəsinə çevrilə bilər”, – deyə o vurğulayıb.

Pakistan rəsmisi əlavə edib ki, ABŞ-nin İranın nüvə obyektlərinə qarşı həyata keçirdiyi hücum bir ölkənin suverenliyinə qarşı yönəlmiş aktdır və bunun nəticələrinin yalnız region üçün deyil, qlobal sülh və təhlükəsizlik üçün də ağır ola biləcəyini qeyd edib.

“Biz ABŞ-nin bu hərəkətini təkcə siyasi məsuliyyətsizlik kimi deyil, həm də bəşəriyyətə qarşı yönəlmiş hərbi cinayət kimi dəyərləndiririk. Belə bir addım regionda milyonlarla insanın həyatını təhlükə altına qoyur”, – deyə komitə rəhbəri bəyan edib.