Səfillikdən milyonçuluğa qədəm qoyan bomj gözlərinə inana bilmədi

ABŞ-nin Kaliforniya ştatında küçələrdə yaşayan bir şəxs lotereyadan 1 milyon dollar qazanaraq gündəmə gəlib. Şanslı şəxs qazancını ev və avtomobil almaq üçün istifadə etməyi planlaşdırır.

Məlumata görə, kimliyi açıqlanmayan bu şəxs lotereya biletini illərdir müştərisi olduğu spirtli içki dükanından alıb. O, bileti dükandan çıxan kimi cıraraq qazandığını anlayıb və sevincini gizlədə bilməyib.

Dükan müdiri isə açıqlamasında belə deyib: “Dükanımıza gəldi, bileti cırdı və heyrətlə dedi: “Aman Tanrım, bu doğrudurmu? Mən artıq evsiz deyiləm!”. Mən də ona dedim: “Dostum, durnanı gözündən vurmusan”.

“The Guardian” nəşrinin yaydığı xəbərə görə, əvvəlcə 100 min dollar qazandığını zənn edən şəxsə dükan müdiri bunun əslində 1 milyon dollar olduğunu təsdiqləyib. Daha sonra sahibkar səfili öz avtomobili ilə Kaliforniyanın Fresno şəhərinə apararaq uduş biletini rəsmi olaraq təqdim etməsinə kömək edib.