Sensasiya | Bu ölkənin əsgərləri gizli şəkildə ruslara qarşı döyüşür?
Rusiya KİV-də son günlərdə Ukrayna cəbhəsində fransalı əsgərlərin döyüşdüyünə dair informasiyalar yayılıb.
Hətta yerli media iddia edir ki, müharibədə fransızlardan ibarət yeni legion yaradılıb və onlar Rusiyaya qarşı mübarizə aparırlar. Buna sübut olaraq isə cəbhədə çəkildiyi güman edilən videolar göstərilib.
Görüntülərdə əsgərlərdən birinin huşsuz vəziyyətdə yerdə uzanması və onun üzərində Fransa bayrağının olması öz əksini tapıb. Rusiya mediası onu da iddia edib ki, Fransa Ordusu artıq Ukraynada itkilər verməyə də başlayıb.
Xəbərə görə, azı 7 nəfər Rusiya ilə müharibədə həyatını itirib. Bütün bu iddiaların fonunda isə Fransa tərəfi sözügedən ittihamları qətiyyətlə təkzib edib.
“Fransa Ukraynaya qoşun göndərməyib. Ukraynada Fransa Xarici Legionun əsgərləri yoxdur”, – deyə ölkənin Xarici İşlər Nazirliyinin sosial media hesabındakı paylaşımda qeyd olunub.