SEPAH-ın terror təşkilatı kimi tanınması müzakirə ediləcək - Baku TV

“Avropa İttifaqı İrandakı etirazların amansız şəkildə yatırılmasına cavab olaraq adıçəkilən ölkəyə qarşı yeni məhdudiyyətlər hazırlayır”.

Bunu Aİ-nin xarici işlər və təhlükəsizlik siyasəti üzrə ali nümayəndəsi Kaya Kallas Strasburqda parlamentdə İranla bağlı dinləmələr zamanı bəyan edib.

O vurğulayıb ki, Aİ artıq İrana qarşı insan hüquqlarının pozulması, nüvə fəaliyyəti və Ukraynaya qarşı müharibədə Rusiyaya dəstəyi üçün geniş sanksiyalar tətbiq edib.

Hazırda Aİ İranın pilotsuz uçuş aparatları və raketlərinin istehsalında istifadə edilə bilən komponentlərə əlavə ixrac məhdudiyyətləri təklif edir, həmçinin etirazçılara qarşı təzyiqlərlə əlaqədar yeni sanksiyalar hazırlayır.

“İran son illərin ən böyük nümayişlərini yaşayır. Etirazçılar azadlıq, ləyaqət və öz gələcəklərini müəyyən etmək hüququ tələb edirlər”, – deyə o bildirib.

Kallas əlavə edib ki, hakimiyyət dinc etirazlara zorakılıqla cavab verir, minlərlə insan İran rəsmilərinin özlərinin etiraf etdikləri kimi, son həftələrdə öldürülüb.

Kallas həmçinin qeyd edib ki, Aİ Tehrandan bütün ədalətsiz saxlanılan şəxslərin dərhal azad olunmasını, internetə çıxışın bərpasını və zorakılığın dayandırılmasını tələb edib. Onun sözlərinə görə, İran hakimiyyətinin hərəkətləri regional təhlükəsizliyə təhdid yaradır və gələcək eskalasiya riskini artırır.

Bəzi parlamentarilər İranın şah sülaləsinin son nümayəndəsi Rza Pəhləviyə Avropa Parlamentində çıxış etmək təklifi ediblər və bunu onun etirazlara aid çağırışları ilə əsaslandırıblar. Lakin digər deputatlar bu təşəbbüsləri kəskin şəkildə tənqid edərək yolverilməz olduğunu bildiriblər.

Avropa ölkələrində İran səfirliklərinin fəaliyyətinin məhdudlaşdırılması da tələb olunub. Debatlar zamanı çıxış edən parlament üzvləri Avropa Komissiyasını İrana qarşı yeni ciddi sanksiyalar tətbiq etməyə və SEPAH-ı terror təşkilatı kimi tanımağa çağırıblar.