Sergey Markovdan Gürcüstanda baş verən hadisələrlə bağlı açıqlama

Son günlər Gürcüstan paytaxtında baş verən hadisələr ətrafında müzakirələr səngimək bilmir.

“Xarici agentlər haqqında” qanun layihəsinin parlamentdə müzakirəyə çıxarılmasından sonra yaranan etirazlara hətta Prezidentdən belə dəstək gəlib. Ancaq hakim partiya həmin layihənin təsdiqində israrlıdır.

Hökumətlə müxalifət arasında böyüyən fikir ayrılığı isə belə bir sualı ortaya çıxarır. Əslində, Tbilisi hansı istiqamətə doğru addım atmaq niyyətindədir? Qərbə, yoxsa Rusiyaya?

Minlərlə insanı parlament binası önündə aksiyalara çəkən də məhz bu sualdır. Ölkədə baş verən son hadisələri yalnız hansısa bir qanuna görə yaranan narazılıq kimi təqdim etmək doğru olmazdı. Çünki aksiyaların daha dərin alt qatları var. Burada söhbət daha çox Gürcüstanın strateji seçimindən gedir.

Rusiyalı politoloq Sergey Markov Baku TV-yə açıqlamasında bildirib ki, gürcülərin əksəriyyəti 2008-ci ildə Rusiya ilə Gürcüstan arasında baş verən və birincinin qalib olduğu, daha çox beşgünlük müharibə kimi yadda qalan hadisələri unutmayıb:

“Eyni zamanda Ukraynanın bugünkü vəziyyətini gözdən keçirən heç bir ölkə Rusiya ilə birbaşa münaqişəyə girmək istəməz. Əksəriyyət Gürcüstanın neytral mövqe tutmasını istəyir.

İndiki məqamda Qərb istəyir ki, Gürcüstan hökuməti anti-Moskva sanksiyalarına qoşulsun, daha radikal variantda isə Rusiya ilə müharibənin ikinci cəbhəsini açsın. Yəni Abxaziya və Cənubi Osetiyada hərbi əməliyyatlara başlanılsın. Qərbin dəstəklədiyi, sərt anti-Rusiya mövqeyi tutan bir sıra siyasi qüvvələr var. Bu qüvvələr xaricdən maliyyələşdirilir.

Hökumət xarici agentlər haqqında qanunu qəbul etməklə hakimiyyəti əlində saxlamağa çalışır. Xarici agentlərlə bağlı Gürcüstan qanunu Amerika qanunlarının 95% surətidir. Təbii ki, o, bir az da Rusiya qanununu təkrarlayır, çünki Rusiya qanunu da əslində, Amerika variantından bəhrələnib.

Qərb müxalifətin bu qanun layihəsinə qarşı keçirdiyi kütləvi etirazları dəstəkləyir. Hökumət indi çox gözəl başa düşür ki, güzəştə getsə, böyük ehtimalla hakimiyyəti əldən verəcək. Buna görə də sona qədər öz mövqeyində qalacaq”.