Sərhəd mübahisəsi hərbi toqquşmaya çevrildi | Dünyada yeni savaş ocağı yaranır?

Kamboca və Tailand arasında sərhəd mübahisəsi ilə bağlı həftələrdir davam edən gərginlik şiddətli toqquşmalara çevrilib.

Kamboca tərəfindən endirilən zərbələr nəticəsində Tailandda 11 mülki şəxs həlak olub.

“Reuters” Tailandın Səhiyyə Nazirliyinə istinadən məlumat yayıb ki, eyni zamanda 1 hərbçi ölüb.

Tailandın “F-16” döyüş təyyarəsindən biri Kambocaya atəş açıb və hərbi hədəf məhv edilib.

Bundan başqa, Tailandın Kamboca ilə həmsərhəd olan Sisaket əyalətində yanacaqdoldurma məntəqəsi və yanındakı mağazada yanğın qeydə alınıb. Hadisənin Tailandın “F-16” qırıcısı ilə Kambocadakı hədəfləri bombaladığı bir vaxtda törədildiyi bildirilib.

Tailandın Kambocadakı səfirliyi münaqişənin kəskinləşməsi fonunda vətəndaşları bu ölkəni tərk etməyə çağırıb. Silahlı toqquşmaların davam etdiyi barədə məlumat var.

Qeyd edək ki, Kamboca iyulun 24-də səhər saatlarında Tailanda pilotsuz təyyarələrlə atəş açıb və qırıcılara reaktiv qumbaraatanlarla hücum edib. İyulun 21-də Tailand Kambocanı sərhəddə piyada əleyhinə minalar yerləşdirməkdə ittiham edib.