Sərhəddə "Tanker planı"na alovlu etiraz | Gərginlik pik həddə!

İranın İslam İnqilabı Keşikçiləri Korpusu (SEPAH) Pakistanla sərhəddə yerləşən Midjav şəhərində tankerlərdən məcburi şəkildə yanacaq götürmək üçün çənlər quraşdırıb, lakin buna etiraz edən bölgə əhalisi onları yandırıb.

Bu barədə “Azad İran” “Telegram” kanalı xəbər verib.

Etirazçıların sözlərinə görə, çənlərin yaradılması layihəsi yanacağın bir hissəsinin təhlükəsizlik qüvvələrinə və dövlət qurumlarına tabe olan şəxslər arasında bölüşdürülməsini nəzərdə tutur, yanacağın bir hissəsi isə tankerlərdən ucuz qiymətə alınacaq.

Bölgə əhalisi və regionun müxtəlif tayfaları daha əvvəl dəfələrlə bu layihənin həyata keçirilməsi ilə razılaşmadıqlarını bəyan ediblər, çünki bunun 40-50 mindən çox insanın işsizliyinə səbəb olacacağını düşünürlər.

Etirazçılar çənlərin çoxunu yandırıblar, qalanlarını isə deşiblər.

Qeyd edək ki, sentyabrın 8-i səhər saatlarında Bəluc sakinləri SEPAH-ın Qüds Qüvvələrinə bağlı Salman briqadasının qarşısına toplaşaraq Rohtak sərhəd-keçid məntəqəsinin bağlanmasına və qondarma “tanker planı”nın həyata keçirilməsinə etirazlarını bildiriblər.