Şərqi Qüds və İordan çayının qərb sahilində BMT-nin işi niyə çətinləşib?

“Qəzzadakı aclıq və ümidsizliyi təkcə ərzaq paylanması ilə aradan qaldırmaq mümkün deyil”.

Bu sözləri BMT komissarı Filip Lazzarini söyləyib.

O bildirib ki, İsrail parlamenti ‒ Knesset tərəfindən qəbul edilən iki yeni qanun BMT əməkdaşlarının fəaliyyətini daha da məhdudlaşdırıb:

“Bu qərarlardan sonra bəzi əməkdaşlarımız Şərqi Qüds, İordan çayının qərb sahili və Qəzzadan geri çəkilməli oldu. Çətinliklərə baxmayaraq, fəaliyyətimizi davam etdiririk”.

F.Lazzarini bildirib ki, yardım dolu 6 mindən çox yük maşını Misir və İordaniyadadır. Humanitar yardım Qəzzaya daxil olmağı gözləyir.

BMT-nin Fələstinli Qaçqınlara Yardım və İşlər üzrə Agentliyinin Yaxın Şərq üzrə baş komissarı əsas maneə kimi İsrailin Agentliyə qoyduğu məhdudiyyətləri göstərib.

Bundan başqa, Qəzza zolağında UNICEF və tərəfdaşları tərəfindən təşkil olunan peyvəndlənmə kampaniyası davam edir və müharibə səbəbi ilə vaksinasiyadan keçməyən 44 mindən çox uşağa peyvəndin vurulması gözlənilir.

Bildirək ki, HƏMAS tərəfindən daha bir girovun meyiti İsrailə təhvil verilib. Məlumata görə, meyit Meni Qodarda aiddir.

Qeyd edək ki, oktyabr ayındakı atəşkəs razılaşmasına əsasən, HƏMAS Qəzzada saxlanılan sağ qalan 20 girovun hamısını İsrailin saxladığı təxminən 2 min fələstinli məhbus və müharibə əsiri ilə mübadilə edərək azad edib.