Səudiyyə Ərəbistanında qeyri-adi hava şəraiti yaşandı

21 dekabr 2025 338 baxış

Səudiyyə Ərəbistanının səhralıq bölgələrində qeyri-adi hava şəraiti yaşanıb.

Ölkənin şimal-qərb və mərkəzi hissələrinə onilliklər ərzində ilk dəfə qar yağıb.

Yerli media Ər-Riyadda və ətraf ərazilərdə müşahidə olunan mənzərəni nadir hal adlandırıb. "Əl-Ərəbiyyə" belə bir hadisənin təxminən 30 ildir baş vermədiyini bildirib.

Adətən isti və quraq iqlimi ilə tanınan bu bölgələrdə qarın düşməsi bir çox sakin üçün təəccüb doğurub. Qeyri-adi hava şəraiti bəzi ərazilərdə yolların bağlanmasına səbəb olub, avtomobillərin hərəkətində xaos yaradıb.

Ölkənin bəzi ərazilərində dolu və güclü ildırım səbəbindən qırmızı və narıncı hava xəbərdarlıqları elan olunub. Meteoroloqlar bildirirlər ki, belə ekstremal hava hadisələri Səudiyyə Ərəbistanında çox nadir hallarda baş verir və bu, regionun iqlimində dəyişikliklərin mümkün əlaməti kimi qiymətləndirilir.

#Səudiyyə Ərəbistanı