Silahlılar Konqonun şimalına hücum həyata keçiriblər

Konqo Demokratik Respublikasında "İslam Dövləti" (İD) ilə əlaqəli silahlılar ölkənin şərqində həyata keçirilən hücumlar zamanı 89 dinc sakini qətlə yetiriblər.

Bunu "Reuters" BMT-nin sülhməramlı missiyasına istinadən xəbər verib.

Məlumata əsasən, hücumlar "Müttəfiq Demokratik Qüvvələr"in (ADF) silahlıları tərəfindən Şimali Kivu vilayətinin bir neçə yaşayış məntəqəsində 13-19 noyabr tarixləri arasında törədilib. 89 nəfərdən azı 20-si qadındır. Onların arasında qeyri- müəyyən sayda uşaq da var.

Hücumlardan birində silahlılar Byambve qəsəbəsindəki katolik kilsəsinə aid tibb mərkəzinə basqın edərək, hamilə qadınlar da daxil olmaqla, ən azı 17 nəfəri öldürüblər və xəstələrin yerləşdiyi 4 şöbəni isə yandırıblar.

Digər cinayətlər arasında insanların oğurlanması və tibbi preparatların talan edilməsi də var.

"BMT-nin sülhməramlı missiyası Konqo hakimiyyətini bu kütləvi qətllərin icraçılarını və köməkçilərini müəyyənləşdirərək məsuliyyətə cəlb etmək üçün dərhal müstəqil və etibarlı araşdırmaya başlamağa çağırır", – deyə təşkilatın bəyanatında qeyd olunub.