Simonyan müxalifətə müraciət etdi | Onların məqsədi hakimiyyətə gəlmək deyil, sübutlar var!

“5-ci kolon” Ermənistanda fəaliyyətini davam etdirir, onlar parlamentdə də fəaliyyət göstərirlər.

Bunu Ermənistan parlamentinin spikeri Alen Simonyan müxalifətə müraciətində deyib.

“Rəqiblərlə harmoniyada işləyirlər, bəzən rus dilində danışırlar, amma bu heç nəyə gətirib çıxarmır. Çünki müxalifətin məqsədi hakimiyyətə gəlmək deyil, buna kifayət qədər dəlillər var.

Əgər hökuməti devirmək istəyirdinizsə, Vazgen Manukyanı gətirmək nəyə lazım idi? Əgər kreslo belə yaxşıdırsa, niyə heç kim onu almağa cəsarət etmədi? Vazgen Manukyanı gətirdiniz, çünki sizə hökuməti götürmək lazım deyildi, ona görə ki, məsuliyyət işidir. Sonra da istəmədiniz, ona görə Kanada vətəndaşını (Baqrat Qalstanyanı nəzərdə tutur) gətirdiniz”, – spiker bildirib.

A.Simonyan əlavə edib ki, müxalifət indi də hakimiyyəti ələ keçirmək istəmir və onların məqsədi növbəti parlamentdə müəyyən qədər yer tutmaqdır:

“Reallıqda müxalifət dalandadır və bu, ciddi siyasi dalandır”.

Xatırladaq ki, 44 günlük müharibədən sonra İrəvanda hakimiyyət əleyhinə aksiyalar başlamışdı. Müxalif hərəkata rəhbərlik o zaman sabiq baş nazir Vazgen Manukyana həvalə olunmuşdu. Aksiyalardan sonra 2021-ci ilin yayında Nikol Paşinyan hökuməti erkən seçkilərə getsə də, müxalifət məğlub olmuşdu. Baqrat Qalstanyanın ötən ilin yayında keçirdiyi aksiyalar da nəticəsiz bitmişdi.